Төлевилелдиң ажыы дыка улуг

Сүт-Хөл кожууннуң Алдан Маадыр сумузунда “Инек чемгерикчим малым” губернатор төлевилелинде 15 өг-бүле киржип турар. Ниитизи-биле бо хүнде бода малдың баш саны 41 четкен.

Кышты хүр ажары-биле сигенни чедер кылдыр белеткеп алганнар. Немелде мал чеминиң курлавырын болгаш дусту б аза белеткээн. Губернатор төлевилелиниң малын сумунуң мал эмчизи Тайгаана Ооржак хайгааралга алган.

“Инек чемгерикчим малым” губернатор төлевилелиниң 2016 чылда киржикчизи Ырыстуу биле Саида Монгуштарның өг-бүлезиниң малы өзүп көвүдээн.

– Эгезинде бо өг-бүлеге бергедээшкиннер турза-даа, олар мал бажын өстүрер сорулганы мурнунга салып алган. Баштайгы эр бызаазын кыс молдургага орнап алгаш малының баш санын чеди чедир өстүрген. Амгы үеде өдээнде ийи инек, хунан, ийи молдурга, ийи бызаа бар. Күзүн 7 тонна сигенни болгаш немелде мал чемин белеткеп алганнар. Сүт-саан үезинде бир инээнден-не 7-10 литр сүттү саап ап, ааржы, быштак, өреме, саржагны белеткеп алыр.

Алдан-Маадырның «Көжээ» деп черинге чайлаглап, малын семиртир азырап өөрени бергеннер. Хөй ажы-төлдүг өг-бүлелерге бо төлевилелдиң ажыы дыка улуг деп чүүлдү амыдыралда көрүп тур бис – деп, Сүт-Хөлдүң Өг-бүлеге болгаш уругларга социал дуза чедирер төвүнүң дүрген социал дуза чедирер килдистиң эргелекчизи Чойган Ондар демдегледи.

Монгуштарның өг-бүлезиниң улуу студент, ийизи өөреникчилер. Олар инектерин карактап, кажаазын аштап, арыглап, кыжын сиген-ширбиил каап бээринге күзелдии-биле дузалажыр. Ырыстуу биле Саида Монгуштар ада-ие болурундан аңгыда ийи уйнуктарының ынак кырган-авазы болгаш кырган-ачазы база.